RICORDI... Di scopre ‘sta lista cù i nomi di tutti i cumpaisani di i tempi di a so zitellina hé un stringjicore. Sessant’anni è più sò scorsi. Quanti, frà elli, ùn sò più quì per dicci a vita di tandu. Hà ragione bc di dì chì ci hè un abissu trà oghje è tandu. Ne eramu sempre guasi à l’epica di u mediuevu. Tuttu ‘stu mondu campava in e case accumpulate di u vechju paese. E sole case chì ghjeranu un pocu staccate da u paese, eranu quella di Petru Vincenzu, in a Piana, quella di Spinnelli, in a Reppula, quella di Bazziconi, in u Valdu è quella di Matteu Cordoliani, ind’è i Meli. Ghjera cum’è una grande è sola famiglia perchè eramu tutti più o menu parenti. Tandu i matrimonii si facianu, pè u più, in paese, dopu avè fattu a fughjera. L’anziani avianu guasi tutti un nome corsu è omu si pò dumandà perchè, prete Flori, ùn hà micca fattu usu di u veru nome impiigatu tandu, ellu chì ghjera unu di quelli chì scrivia u corsu. Purtantu sunava bè Ghjuvan Fiore, Orsu Paulu, San Vitu... Jbg