PIAZZA DI L'URTIGIÒ
Piazza di l’Ortigiò s’hè ammutulita torna un pocu di più cù a partenza di Daria Acquaviva è di Georgette Gareminck, nate Morelli. Tamanta tristezza in issu locu pienu di vita tanti anni fà. Simu quì in u core di u paese. E case viote in giru à a piazza si tenenu strinte una cun l’altra per dassi curagiu è sperenza. Sperenza di sente trosti di vita per e so finestre aperte, rise è canti per i so terrazzoli, di vede issu quartieru rispirà. Oghje una quistione si pone, è ancu s’impone : cume fà per rivittulì u vechju paese chì, s’ellu ùn hè micca statu fattu da architetti, porta bellezze ch’ùn si sà più cuncepì.
Ma femu un saltu di una cinquantina o sessantina d’anni in daretu. Ùn ci hè mancuna casa spachja. In piazza si ride, si ciarla, si chjachjareghja, si riface u mondu in tempi di pulitica, l’azzuffi sò verbali. Ind’è a casa chì ha vistu parte à Daria ci stavanu quattru surelle : Julie è Fiffina Negroni, Félicité sposa Rutali, Jeanne sposa Giovannangeli. Più sopra Ghjuvan Battistu Castellani, a signora Emma è Annitta (‘sta casa hè a sola, di a piazza, à esse occupata oghje in permanenza da a famiglia di Jean-Claude è di Marie-Josée Perfetti). Dopu ci hè Dominique è Lisà Garibaldi cù i so cinque figlioli. Accantu, a famiglia di Bertollu e di Natalina Andreani ; dopu quella di San Vitu è di Anghjula Morelli è quella di Ghjuvanninu è di Lellena Garibaldi. Cuntinuendu u giru, ci hè a famiglia di Jacques è di Sgianna Giacomoni (7 figlioli) eppò accantu, François Pantanacce (‘ste duie ultime case hanu l’affaccu nantu à a piazza ma micca l’entrata principale).
Da banda suttana, ci hè a famiglia di Benedettu è di Vincensa Flori, cù Sgianna, Pierrette è Jeannette. Accantu Ceccu Albertini, Anghjula Maria è Paul u so figliolu. Più sottu, Filippu Antone è Benedetta Pruneta, Angèle è Antoine Muglioni. Dopu, Peppè è Catherine, è a famiglia di Silvè è di Fiffina Murati. Vicinu, a famiglia di Carlu Filice è di Antuanetta Giuliani è, infine, in l’ultima casa (tandu a porta d’entrata dava versu a piazza) Limpia Morelli cù Georgette è a so figliola Angèle Marie.
A nostra memoria hè piena di ricordi di tutte ‘ste ghjente, oramai, pè u più, smarite. ‘Stu locu era u soiu. Ci piaceria ch’ellu si spanni d’una vita nova. Per noi è per elli .
JBG