Dopu à a catastrofa d’elicotteru in Rutali u 25 d’aprile 2009 Una puesia di Ghjiseppu Micaelli di A Ghisunaccia Trascritta da Luigi Giacomoni SCUMPIENTU

E calanche di Lancone* Stampate d’un puntu neru Forte hè la cumpassione Di stu destinu severu Chi cinque giovane persone Sò andate à u disesperu. Tocca la Corsica sana Stu dolu cusi crudele Sta disgrazia chi n’affanna À chì hà spintu le candele È pienghje ogni mamma Offesa di core è di fele Povera criaturella Ch’ hè sparita attempu nata S’hè spinta la so stella Di a so vita sfurtunata Inseme à la so mammarella À l’eternu si n’hè andata I so oghji appena nati Sò stati cum’è lu fiore Chi prestu si sò serrati Senza cunnosce culore Strughjendu lu so parfume À l’uchjata di u so lume À sti dui aviatori Ùn li si pò truvà lite Cù duttori di valori Quant’anu salvatu vite Rigrettemu incù dulore Ste cinque anime sparite** I suspiri nè li pienti Ùn addolcanu la pena Per babbi, mamme è parenti Pisiva hè la catena Prighemu per la so pace Chi troppu male ci face *Infatti: u monte di a Turricella in faccia a un Lancone nant’a cumuna di Rutali ** Dutturessa Michèle Salmon Pilotu: Philippe Metais Co pilotu: Michel Guia-Lopez Parturiente: Justine Gressler U so ciucciu: Léo