U CIGNALE CORSU per Filippu Tancelin Sò venuti per tumbammi. Setu i so passi trizinà ind’è e cuscogliule, strunchizzà e legne secche. Aghju u spinu sticchitu, ma ùn l’averanu micca a mo pella, sentu a fumata calla di sanguinarii. Stò à sente, intrepitu, l’abbaghju di i cani. Sò venuti per vedemi strazià eppo more, chi ùn sanu micca a superbia di u mo stintu. Sti barbari ùn volenu chè a mo spoglia… Bella bestia tamanta è superba, à e setule dure, inuguale hè a to lotta mai stanca, contru à stu caneghju armatu di macellari è tù, à mezu à ste disgraziate cacciamosse d’omi-ughjuloni, d’omi-carnaghji, sbulichendu sepali è capparoni, girendu e sette chjapelle, minendu a campagna, cù i fucili pisii carchi à piombu grossu. A le volte tombanu, sia una vacca o ancu un omu… À disgrazia, dicenu i cacciadori chì facenu e voce ! Tuttu hè per u scempiu, _ à brusgiapelu ! Impussibule ! Un cignale ùn po micca scappassine ! Ci vole ch’ellu dessi battaglia, _ solu contru à tutti. Nobile è putente animale ! Di spiritu scupinu ! Curagiosu assai, si ne và in a so virtù, in a so resistenza ch’ùn istanca, _ à u nimicu. E prove di u so curagiu indumevule in l’azzuffi ùn sò più da fà. Pensate ! U cignale corsu grugnuleghja sempre, prontu à entre in guerra, _ s’omu li tene pettu, quandu omu nuce à a so divina tranquillità. Impettuoso è dannificu, salvaticu in quantu à u so mendu mai saziu di a bundanza, ùn hè micca di quelli chi fughjenu quandu omu u cerca. A l’incuntrariu ! Nuda li face paura ! Mancu u piombu grossu luccichiu, di i tonduli è murtalli pallini. Face fronte, tremendu è temutu, è avanti !... Li fraga di u so pesu sanu, di u so coghju zeppu, di e so sanne arrutate. Un hè tempu da discorre. A sfrimbulate, _ ci si intende sta singulare bestia ! E, contru à i razzoni di l’umanità, st’omi abbandati, onore sia fattu à u cignale ! O fieru cignale corsu, quantu ti tengu caru ! Sergiu Venturini, 1ma novembre di u 2000.