U LAMENTU DI L'OLMU

U LAMENTU DI L'OLMU Originally uploaded by PP1.

Passendu, stamane, mi sò fattu un’ultima retta sott’à l’olmu. Aghju lampatu una voce : o di l’olmu, ùn ci hè nimu ? Nisuna risposta. L’ultimi statinenti si ne sò andati pè ‘sse cità vicine o luntane. L’olmu chì avia messu u so più bellu vestitu, d’oru è di fiamma, avà cappia e so fronde, in e rambelle cimarole da u frischettu ingaladite. Un ventulellu laziosu, fendu prumessa d’un bellu viaghju, e si porta, una à una, in un valzu indiavulatu di libertà scema. Si pò vede, dentru à un forca suprana un nidu ch’ell’ùn piatta più. Dicenu chì ghjè custì chì u cuccu avia messu u so ovu, cunniscendu e qualità di a baglia scelta per sgrunchjulì u so cacanile. U senteremu u so cantu, à l’aprile. Finora l’ampara per i cuntorni di l’Africa. Eppoi, eccu chì unu passendu, in brama di scherzighjà, lampa, ridichjulendu : o amicu, ti scappanu tutte, oghje ! E l’olmu, azezu, di falli a risposta segondu a pruposta : ùn ti ne ride di mè chì à tè ti sò scappate e to parolle è chì sì à lingua in prestu ! Ci vole à capillu à l’olmu chì sente l’inguernu avvicinassi. Ùn ne simu nancu, macaru, à l’inguernu di a nostra lingua. Tanti sforzi sò fatti per falla campà, sia cantendu, sia scrivendu, sia parlendu in varie occasione. Tenì, state à sente à ghjuvan Carlu Marsily, è u saviu Ghjuvan Ghjaseppiu Franchi, nant’à RCFM, in l’emissione « Dite a vostra » o puru à Ghjuvan Petru Acquaviva, è un antru saviu Ghjuvan Carlu Antolini, in l’emissione cunsacrata à a tupunimia. Eccu dui belli esempii di e strade à piglià per purtalla à salvamentu. Inseme, pensendu à ‘stu dettu : strada bella ùn fubbe mai longa. Jbg.