In la mo andata, in lu mo core,"in sta fotto" ghjè di fighjà i nostri antichi di leghje è rileghje i nomi in lu monumentu, i nomi di quelli ch'ùn ci so più, in la mo spassighjatta, à elli, 

à e mamme, li offru sta puesia...

ULTIMA PRIGHERA

O Mà, scusa u dulore

Di questa puesia,

À le mo ultime ore

Stà forte è cusì sia,

Per fà sempre onore

À tuttu lu mo amore.

Stamane sò cascatu

Sotta e palle di un nemicu,

Perdonali 'ssu fattu

Serebbe statu forse un amicu,

In stu mondu ingratu

Chì oghje m' hà cundannatu.

In stu ultimu ghjornu

Ti sentu tantu vicina,

Ùn aspetti più ritornu

È preghi in sta matina,

Ma nun vogliu chì lu ventu

Faccia sente lu to pientu.

O Mà, dammi la to manu

È portami cum' è prima,

À li Pantani per lu Rumanu

U mo core è la mo anima,

In stu ritrattu luntanu

À lu mo ricordu steranu.

Sentu dinù la to voce

M' addurmintava la riturnella,

Sè m' accumpagna oghje la croce

Fà cantà messa in paghjella,

Per u to figliolu suldatu

Chì a guerra t' hà pigliatu.

Ma nun vogliu o Mà

Onori d' una patria,

Prumettimi sta chjama

In lu to core stia,

Sempre quellu zitellu

Chè tù purtasti in camancellu.

O Mà chì ghjè stu lume

Chì vegu cum' una stella?

Dimmi o Mà cume...

Dimmi o Mà....

GHJANPA